Gipadayag sa Pilipinas nga usa ka direktang paglapas sa internasyonal nga balaod ang bag-ong polisiya sa China sa pagsikop sa mga “trespassers” sa kadagatan nga giangkon niini.
Sa usa ka pahayag, ang Department of Foreign Affairs (DFA) miingon nga ang China dili makapatuman sa kaugalingon nga mga balaod sulod sa teritoryo sa usa ka soberanong estado.
Diin ang buhatan nagkanayon nga ang matag soberanya nga estado adunay katungod sa paghimo og mga balaod, lakip ang pagpatuman sa lokal nga lehislasyon sulod sa iyang hurisdiksyon.
Gitumbok sa DFA nga ang mga bag-ong regulasyon sa China nga gi-issue basi sa 2021 Coast Guard nga balaod usa ka ilegal nga nagpalapad sa maritime law enforcement powers sa China’s Coast Guard.
Ang bag-ong polisiya niabot human ang “Atin Ito” Coalition nagpahigayon og civilian convoy niadtong Mayo 15 hangtod 17 paingon sa Scarborough Shoal (Panatag Shoal o Bajo de Masinloc) sa West Philippine Sea (WPS), nga kabahin sa lapad nga South China Sea nga hingpit nga giangkon sa Beijing nga ilaha.
Gihangyo usab sa DFA ang China nga siguraduhon nga ang mga hingtungdan nga lehislasyon niini tin-aw nga nagpakita ug nagsunod sa mga pasalig ug obligasyon sa ilawom sa internasyonal nga balaod, labi na ang 1982 United Nations Convention on the Law of the Sea, ug ang nagbugkos nga 2016 Arbitral Award sa South China Sea, ingon man ang 2002 nga Deklarasyon sa Paggawi sa mga Partido sa South China Sea.
