Kinahanglang ipasar ug aprobahan sa Senado kung makahukom ang administrasyon nga mobalik isip miyembro sa International Criminal Court (ICC), matud ni Senador Sonny Angara ug Senate Minority Leader Koko Pimentel.
Asoy pa ni Angara nga kon madayon kini, ang Pilipinas makonsiderar nga bag-ong entrante sa Rome Statute o ang tratado nga nagtukod sa ICC.
Kini nunot sa pamahayag sa Department of Justice nga ilang ipresentar ngadto kang Presidente Ferdinand Marcos Jr., sa plano bahin sa posibilidad nga moluwat og warrant of arrest ang ICC batok sa mga nalambigit sa war on drugs nga gipatuman sa miaging administrasyon.
Ingon man ang posibilidad nga mobalik ang Pilipinas sa ICC.
Samtang gipadayag usab nila ni Angara ug Senador Nancy Binay nga dili makatabang sa nasud ang politikanhong kaguliyang sa kasamtangang nahitabo.
Gani, gihatagan og gibug-aton ni Angara, nga makabalda kini sa mas importanteng isyu nga giatubang sa nasud sama sa inflation ug nasudnong seguridad.
