Gipasiugda sa Armed Forces of the Philippines (AFP) nga walay tinguha ang Pilipinas nga makig-away sa China o sa bisan unsang nasod taliwala sa nagpadayon nga tensyon sa West Philippine Sea.
Kini ang tubag sa AFP human sa pahayag ni Vice President Sara Duterte sa Hong Kong, diin iyang giawhag ang mga opisyal sa gobyerno nga likayan ang komprontasyon sa ubang mga nasod, lakip na ang China.
Matod ni AFP spokesperson for the West Philippine Sea nga si retired Rear Admiral Roy Vincent Trinidad, ang Pilipinas nagbarog lamang alang sa mga katungod niini sa kadagatan, soberanya ug kagawasan isip usa ka independenteng nasod.
Gipasabot niya nga ang AFP ug Department of National Defense nagtinguha nga maseguro nga ang sunod nga henerasyon makapanunod og usa ka Pilipinas nga bug-os ug gawasnon.
Gidugang ni Trinidad nga wala nag-angkon ang Pilipinas sa mga teritoryo nga dili iya, busa dili angay nga isipon kini nga maoy nagpasiugda sa panagbangi.
Gipasiugda usab niya nga responsibilidad sa matag Pilipino ang pagpanalipod sa nasudnong interes.
