Gipasiguro sa Malacañang nga walay angay ikabalaka ang katawhang Pilipino sa gamay nga pagsaka sa inflation rate nga natala niadtong bulan sa Septiyembre, nga miabot lamang sa 1.7%.
Kini base sa pamahayag ni Presidential Communications Office (PCO) Undersecretary Atty. Claire Castro, nga nagkanayon nga ilang gikonsulta ang economic team sa administrasyong Marcos kabahin sa isyu.
Matod ni Castro, wala pa kini molapas sa gikatakdang projection range nga 2% hangtod 4%, hinungdan nga giisip kini nga kontrolado ug dili kabalak-an.
Giangkon usab ni Castro nga hinay pa ang pagtaas sa presyo sa palaliton, base sa assessment nila ni National Economic and Development Authority (NEDA) Secretary Arsenio Balisacan ug ni Special Assistant to the President for Investment and Economic Affairs Frederick Go.
Gipasabot ni Castro nga padayon nga epekto sa sunod-sunod nga bagyo nga miigo sa nasud ang usa sa pangunang hinungdan sa pagsaka sa presyo sa mga utanon, nga usa sa mga gi-monitor sa inflation basket.
Sa laing bahin, gikumpirma sa Philippine Statistics Authority (PSA) nga mas hinay ang inflation rate karong tuiga, kon itandi sa 1.9% nga natala sa parehong buwan niadtong Setyembre 2024.
