Nagpagawas sa pinundong tubig ang pinakadako nga dam sa Northern Luzon nga ang Magat Dam isip pagpangandam sa gipaabot nga epekto sa Bagyong “Uwan”.
Base sa report sa Hydro-Meteorology Division sa state weather bureau niadtong Nobyembre 6, ang lebel sa tubig sa dam anaa sa 188.74 metros, o lima ka metros lang ang kulang sa normal nga taas nga lebel sa tubig nga 193 metros.
Misaka ang lebel niini sukad niadtong nakalabayng mga adlaw tungod sa sunod-sunod nga pag-ulan sa Cagayan Valley ug Cordillera Administrative Region.
Sa pagkakaron, usa sa mga ganghaan niini ang ablihan ug adunay usa ka metros nga abli.
Nagpagawas kini ug total nga 285.72 cubic meters per second.
Ang mga komunidad sa Northern Luzon gipahibalo na usab daan nga sila mahimong maapektuhan tungod sa daghang gidaghanon sa tubig nga gipagawas niini.
Base sa forecast sa state weather bureau, ang dam mahimong maapektuhan sa kaylap nga pag-ulan nga dala sa bagyong Uwan, kung kini moigo sa Cagayan Valley diin nahimutang ang dam.
