CEBU CITY- Pagatukuron sulod sa dakbayan sa Sugbo ang pinakaunang 12-ka andana nga medium rise Public School Building nga gitanyag isip nag-una sa tibuok nasod.
Gibutyag kini atol sa groundbreaking ceremony sa Don Vicente Rama Memorial National High School (DVRMNHS) nga nahimutang sa Barangay Basak San Nicolas kagahapong adlawa sa Huwebes, Enero 30, 2025.
Ang maong medium-rise school building kay adunay 42 ka mga classroom ug 9 ka mga workshop rooms nga magamit sa mga tinun-an sa junior ug senior high school sa habagatang distrito sa dakbayan sa Sugbo.
Gipasar ang maong balaodnon sa pagpatukod sa maong proyekto ni Cebu City South District Rep. Eduardo “Edu” Rama Jr.
Ang groundbreaking ceremony kay giubanan sab sa presenya nila Department of Education (DepEd) Secretary Juan Edgardo “Sonny” Angara, Department of Public Works and Highways (DPWH) Secretary Manuel Bonoan, ug Department of Budget and Management (DBM) Secretary Amenah “Mina” Flaminiano Pangandaman.
Matod pa ni Education Secretary Angara nga subay sa maong proyekto nga pinakauna sa tibouk nasod kay unta ampingan pud kini dili lang sa mga magtutudlo apan lakip na sa mga tinun-an niini gikan sa dakbayan.
Ang pagtukod sa medium-rise academic school building gikatakdang sugdan gikan sa Marso hangtod sa Disyembre karong tuiga, nga adunay 24-hours nga construction shifts.
Kini tukoron sa dapit sa kasamtangang hearing-impaired building ug sa 1-storey, 2 classroom building sulod sa 14,000-square-meter campus area sa DVRMNHS.
