CONSOLACION,CEBU- Nagpahigayon og Inauguration ug Blessing Ceremony sa pinakaunang Regional Rehabilitation Center for Youth Girls ang Department of Social Welfare and Development (DSWD) sa Sitio Baha-baha, Barangay Tayud, lungsod sa Consolacion sa amihanang Sugbo karong adlawa sa Biyernes, Hunyo 20, 2025.
Gitambongan ang maong kalihokan sa mga dagkong opisyal sa nasudnong panggamhanan sama nilang DSWD Secretary Rex Gatchalian uban nilang Committee on Family Courts and Juvenile Concerns (CCFCJC) Vice Chairperson Associate Justice Geraldine Fiel-Macaraig, ug ni DSWD Assistant Secretary for Legislative Affairs Elaine Fallarcuna.
Misalmot sab sa seremonyas ang mga lokal nga opisyales sama nilang DSWD-7 Regional Director Shalaine Marie Lucero, Juvenile Justice and Welfare Council Executive Director Tricia Clare Oco, Fr. Eugenio Docoy Jr., SVD, Consolacion Municipal Mayor Teresa “Nene” Alegado, ug Outgoing Cebu Governor Gwendolyn Garcia.
Sa pakighinabi sa Bombo Radyo Cebu Newsteam kang Secretary Gatchalian nga matod pa niini kay usa kini ka dakong kalampusan sa nasudnong ahensya sa pagtuman sa mando gikan sa administrasyon ang pagtukod og Regional Rehab Center sa mga kabatan-onan babaye nga nalambigit sa lagda sa balaod nga maoy pinakauna sa tibuok Pilipinas.
Ang maong pasilidad kay para sa mga kabatan-onang kababayenhan nga adunay dormitories, therapy rooms, activity areas, ug uban pang specialized services nga naka-desinyo sa pag-empower ug pag-rehabilitate sa mga umaabot residente niini.
Kabahin kini sa padayong tinguha sa DSWD sa pag-promote og restorative justice sa mga kabatan-onan nga nalambigit sa balaod.
Kini nga inisyatiba nagpamatuod sa pasalig sa gobyerno sa gender-responsive, rights-based, ug child-centered approach sa rehabilitasyon.
