CEBU CITY – Pagkutlo sa iyahang kaugalingung kinabuhi ang nahunahuna-an nga solusyon sa usa ka domestic helper nga nakabasi sa Abu Dhabi, UAE kinsang gi-maltrato sa iyahang employer.
Midanguynguy nga nagpakitabang si Aileen Dela Cerna sa iyahang pamilya human nga wala na kini gipaka-un sa iyahang amu.
Matud pa sa OFW nga gikuha usab sa amu niini ang iyahang cellphone hinungdan nga kinawat-kawat na lang ang pag-contact niini sa iyahang pamilya nga anaa dinhi nagpuyu sa Barangay Pahina Central, dakbayan sa Sugbo.
Dugang sa kasakit ni Aileen mao ang kalangay nga paghatag sa iyahang sweldo.
Nasayran nga mahuman pa ang kontrata niini sa buwan sa Agosto, sunud tuig.
Subay niini, midangup ang pamilyang Dela Cerna sa Bombo Radyo Cebu arun nga magpatabang nga ma-uli na si Aileen dinhi sa Pilipinas.
Gibutyag ni Michelle Dela Cerna, ang manghud sa nahisgutang OFW, nga hilabihan na ang ilahang kabalaka sa sitwasyun sa iyahang igsu-un hinungdan nga nanghinaut kini nga ma-uli ang iyahang maguwang sa mas dali nga panahon.
Gikasagmuyu usab sa pamilya niini ang pagdumili sa pag-asistir sa recruitment agency nga maka-uli ang maong OFW.
Sa pagkakarun, padayun nga nakig-alayun ang Bombo Radyo sa mga hingtungdang ahensya arun nga maka-uli na dinhi sa nasud ang nahisgutang OFW.
