CEBU CITY-Gilantaw sa kasamtangan ang tulo ka anggulo sa mga sakop sa kapulisan sa brgy. Balamban ning dakbayan sa Sugbo kabahin sa pagpusil-patay sa usa ka konsehal sa Barangay Prenza sa Lungsod sa Balamban sa milabay nga Huwebes, Oktube 5, 2023.
Giila ang biktima nga si Anastacio Pacquiao, 60 anyos, usa ka konsehal nagpapili isip usa ka kapitan sa ug kasamtangan nga lumolopyo sa Sityo Goya, Brgy. Prenza sa nahisgutang Lungsod.
Tulo ka possibleng anggulo ang gilantaw sa kapulisan sa maong panghitabo. Una niini ang politika, ika duha ang personal nga pagdumot, ug ika tulo ang yuta.
Sa pakighinabi Bombo Radyo Cebu news team ngadto kang Police Lieutenant Colonel Glen Hife, nga mao ang hepe sa Balamban Police Station, nasayran nga na nailhan na sa kapulisan ang mga suspek apan wala pa nila gibutyag ang mga pangalan niini ug sa pagkakaron padayon pa gihapon ang ilahang gipahigayong hot pursuit operation aron sa pagsikop sa mga suspetsado.
Dugang pa nga ang maong mga suspek adunay pending nga warrant of arrest sa kasong murder ug gisusi na sa mga pwersa ang kapulisan sa lungsod sa Balamban ang kabukiran sa maong lugar kung diin nagpuyo ang mga gikatahong suspek.
Gibutyag usab sa hepe nga walay nadawat nga death threat ang maong biktima gumikan kay parte sa ilang palisya mao ang pagpatuman og threat assessment sa mga kandidato diin pangutan-on sila kung aduna ba silay nadawat nga mga death threats pipila ka seman sa dili pa ang eleksyon.
Sa pagkakaron padayun nga gipalwoman sa mga sakop sa kapulisan ang ilahang imbestigasyon aron masuta ang tinuod nga motibo sa maong pagpamusil.
