PROVINCE OF CEBU-Nakasinati og duha ka managlahing pagdahili sa yuta ang natala sa Cebu gahapong adlawa, Hulyo 17, 2024 tungod sa kusog nga ulan dala sa Low Pressure Area (LPA).
Ang unang gikataho n tination sa Brgy. Binongkalan, Catmon, Cebu, diin nahulog ang usa ka trak ug naangol ang 40-anyos nga lalaki kinsang gidali pagdala sa tambalanan human naigo sa bato atol sa insidente.
Samtang, nipakurat usab ang paglihok sa yuta sa Purok Riverside, Brgy. Cantao-an, dakbayan sa Naga, Cebu nga nagbilin og dakong kadaot human nga nangaliki ang mga karsada.
Ingon man nga ubay-ubay nga mga lokalidad sama sa lungsod sa San Remigio ang nagpahigayon usab ug preemptive evacuation sa mga pamilya nga naapektuhan sa baha nga nagsugod niadtong Miyerkules sa hapon.
Matod sa lokal nga kagamhanan sa ilang opisyal nga Facebook page, dili mominus 80 ka mga indibidwal gikan sa Brgy. Lawis gibalhin sa San Remigio Sports Complex ug Evacuation Center.
Ug nimando ang barangay kapitan sa pagpabakwit ug personal nga mi-escort sa mga residente human ang tubig baha nagsugod na sa pagsulod sa ilang tagsa-tagsa ka paminalay.
Gikataho usab sa mga netizen ang pagbaha sa ubang mga dapit sa amihanang Sugbo nga mao’y hinungdan nga dili na maagian ang pipila ka mga dalan, apil na ang highway sa Brgy. Don Pedro, Bogo City nga utlanan sa San Remigio sa kasadpan.
Nasinati usab ang mga pagbaha sa lungsod sa Tabogon ug Borbon samtang ang highway paingon sa Brgy. Daanlungsod kay nahimong dili na maagian tungod sa naputol nga kahoy.
