CEBU-Apektado ang 17 ka mga pamilya human sa nahitabo nga pagdahili sa yuta nunot sa kalit nga pagbunok sa ulan, sa Sitio San Miguel, Barangay Maguikay, dakbayan sa Mandaue.
Sa pakighinabi sa Bombo News Team kang Felix Suico Jr., operations head sa Mandaue City Disaster Risk Reduction Management Office, pasado alas 4 sa hapon sa dihang kalit nga nahugno ang yuta ug daghang mga panimalay ang nangaguba.
Si Jerry Arnado, usa sa mga apektadong residente, niingon nga nauyog ang ilang balay hinungdan nga dali silang mibiya dala ang ilang mga butang ug dihang nibundak ang uwan kalit nga nahugno ang yuta ug nangaguba ang ilang mga panimalay.
Sumala pa niini nga sa 37 ka tuig sa sila nga nagpuyo sa maong lugar, ug ikatulo na usab nga higayon ang pagdahili sa yuta hinungdan nga nakahukom sila nga mobalhin.
Dugang pa niya, tungod sa kadugay sa katuigan ug daghang kalamidad sa nangagi apil na ang linog, posibling nihumok ang yuta hinungdan nga delikado na nga puy-an.
Sa pagkakaron, anaa sa Maguikay Elementary School gym ang mga apektadong pamilya diin nanginahanglan sila og mga gamit sa panimalay, sinina, ingon man financial assistance human sila walay nakuha human sa insidente.
Sa laing bahin, gisusi ug gironda sa Cebu City Fire Volunteers ang mga lugar nga gibahaan aron masuta kon unsay ilang mahimo aron matabangan ang mga pasahero ug residente sa maong dapit.
Naghimo usab sila og evacuation sa pipila ka lugar nga naapektuhan sa baha.
Sa laing bahin, namatay ang singko anyos nga batang babaye nga nagduwa-duwa sa ulan uban sa iyang tres anyos nga igsuon human kini nahulog sa kanal ug naanod sa kusog nga baha sa culvert sa Sitio Lourdes, Barangay Jagobiao, Dakbayan sa Mandaue.
