CEBU CITY-Nakasinati og kusog nga pag-ulan ang pipila ka bahin sa Metro Cebu pasado alas 3 sa hapon, hinungdan sa pagbaha sa pipila ka bahin sa dakbayan sa Mandaue.
Kini ang gikompirmar ni Felix Suico Jr., operations head sa Mandaue City Disaster Risk Reduction Management Office.
Matud ni Suico nga pipila ka mga dapit sa dakbayan ang nakasinati og pagbaha tungod sa pagbunok sa uwan.
Dugang pa, nga niabot pa sa waist level ang tubig baha sa pipila ka dapit.
Pipila sa mga lugar nga gibahaan anaa sa dalan Lopez Jaena sa Barangay Tipolo, Cabancalan, Pagsabungan, ug Ibabao-Estancia.
Hinungdan nga nagpahigayon na sila og evacuation sa pipila niini nga mga lugar.
Dugang pa, ni Suico nga upat ka mga balay ang naapektuhan sa pagdahili sa yuta sa Barangay Maguikay.
Sa pikas bahin, ang Cebu City Fire Volunteers nisusi ug nironda sa mga lugar nga gibahaan aron pagsusi kon unsay ilang mahimo aron matabangan ang mga sumasakay ug mga residente sa maong dapit.
Gipakita usab sa CCFV ang mga hulagway sa usa ka tunghaan sa Barangay Banilad, dakbayan sa Mandaue, kansang ubos nga andana gibahaan human sa kusog nga uwan, inguan man ang usa ka establisemento sa Barangay Banilad, dakbayan sa Sugbo diin gibahaan ang parkinganan.
Gawas sa CCFV, aduna usab mga netizens ang nakakuha og mga litrato ug video sa mga lugar nga gibahaan sa Mandaue City.
Adunay usa ka video nagpakita sa bahin sa Barangay Pagsabungan sa dakbayan sa Mandaue nga nagpakita sa pagbaha sa mga kadalanan.
Laing netizen ang nikuha og hulagway sa basement parking sa usa ka establisemento sa Barangay Banilad, dakbayan sa Mandaue nga gibahaan human sa pagbunok sa uwan.
