CEBU CITY-Mokabat sa 2,000 ka mga miyembro sa advance parties ang niabot na sa ilang mga billeting quarters sa dakbayan sa Sugbo arun mosalmot sa Palarong Pambasa 2024, pipila ka adlaw sa wala pa ang opening ceremonies karong Hulyo 9 sa Cebu City Sports Center.
Sa ilang pag-abot ubay-ubay nga mga Sugbuanon ang migunit og mga banner nga nagpakita og welcome messages sa mga batan-ong atleta sa tibuok nasod nga inanay nang miabot sa Sugbo aron makigtigi sa pinakadakong national sporting event.
Gani, gibisita sa Bombo Radyo Cebu ang pipila ka mga tunghaan arun sa pagsuta sa mga kahimtang ug pagpangandam niini alang sa mga delegado.
Sama nalang sa San Nicolas Elementary School diin gi-okupar sa Region 2 Cagayan Valley nga aduna na’y 680 ka mga delegado ang miabot gahapong adlawa nga gilangkuban sa mga atleta, coaches, staff ug uban pa nga gisugat sa 14 ka green buses sa pantalan.
Gisaysay usab sa School Principal nga si Michael Dasigaw nga aduna’y instructions nga gihatag ang region 2 sa ilang mga atleta apan, ang nadesisyonan nga sundon ang giplano nga sistema sa San Nicolas Elementary School alang sa kaayuhan sa ilang eskwelahan ug sa mga delegado.
