CEBU CITY-Andam na ang gibanabanang 12,000 ka mga atleta, coach, technical officials, ug committee members nga gikan sa nagkadaiyang rehiyon nga mosalmot sa 2024 Palarong Pambansa sa dakbayan sa Sugbo sumala pa ni Adolf Aguilar, ang Asst. Schools Division Superintendent sa Department of Education Cebu City Division.
Kung diin, adunay 38 ka lainlaing sporting venues sulod ug gawas sa dakbayan sa Sugbo lakip na ang Mandaue City diin ipahigayon ang futsal, sepak takraw, ug arnis samtang ang learners convergence ug 3×3 basketball ipahigayon sa Lapu-lapu City.
Mokabat usab sa 20 ka billeting quartets ang giandam alang sa 17 ka regional school delegations ug ang Philippine School Overseas delegation gikan sa United Arab Emirates ug Hongkong ug sa National Academy of Sports nga nakabase sa Tarlac City.
Karong adalwa Hunyo 29, pipila ka mga delegasyon ang moabot sa dakbayan sa Sugbo gikan sa Mactan Cebu International Airport ug sa Cebu Ports Authority Pier aron magsugod sa ilang training routine o ba kaha magsuroysuroy sa mga tourist destination sa tibuok isla sa Sugbo.
Ang mga organizers sa Palaro gihisgutanan usab sa transportasyon tungod kay ang siyudad mopalihok sa mga city bus aron mohakot sa mga delegado gikan sa ilang pag-abot sa Sugbo hangtod sa ilang pagpauli sa katapusan sa sangka karong Hulyo 17.
Dili magmahay ang mga supporters sa mga atleta nga wala moadto sa Sugbo tungod kay naglihok na ang live-streaming broadcast sa mga organizer sa Palaro ug mahimong ma-access sa ilang website ug sa ilang opisyal nga social media page.
