Nanglakaw ang daghang mga delegado nga mitambong sa United Nations General Assembly (UNGA) didto sa New York sa wala pa makahatag sa iyang pakigpulong si Israeli Prime Minister Benjamin Netanyahu.
Kadaghanan sa mga nasod kansang mga delegado nanglakaw kay nagprotesta ug wala mouyon sa mga aksyong militar nga gilusad sa Israel ug sa US batok sa Iran.
Bisan pa sa maong mass walkout, nagpadayon si Netanyahu sa iyang pagpamulong sa entablado.
Matod niya, angay silang magpasalamat sa Israel.
Gipasabot niya nga kon wala pa giatake sa Israel ang mga nuclear facilities sa Iran, lagmit nangamatay na silang tanan karon.
Gisubli usab niya ang pamahayag ni US President Donald Trump nga malampuson nilang napahuyang ang Iranian military ug nuclear capabilities.
Nag-atubang ang Israel og hugot nga pagsupak gikan sa nagkadaiyang mga grupo sama sa Hamas, Hezbollah, Houthis, ug Iran, lakip na ang gikan sa Iraq, Syria, ug Palestine.
Bisan pa niini, gipasiugda ni Netanyahu nga wala silay laing lig-on nga kaalyado gawas sa US.
