Pipila ka mga lider sa Quad Committee sa House of Representatives ang napakyas pag-angkon og suporta sa bag-ohay lang nga eleksyon sa Mayo 12.
Sama ni Congressman Benny Abante nga wala nasuwertehang makadaog sa 6th District sa Manila human gipildi sa iyang kaatbang nga si Joey Uy.
Samtang si Sta. Rosa Rep. Dan Fernandez kinsang midagan pagka gobernador sa Laguna apan gipildi ni Sol. Aragonese.
Anaa sa ikatulo lang si Fernandez sa gubernatorial race sa probinsiya human nakakuha og kapin 280,000 ka boto samtang si Aragones nakadawat og kapin 627,000 ka boto ug si Ruth Hernandez maoy ikaduha nga adunay kapin sa 538,000 ka boto.
Niabot na sab si Abang Lingkod Rep. Stephen ‘Caraps’ sa limit sa termino mao nga dili na siya makabalik sa 20th Congress.
Ang lead chair sa Quad-Comm, Surigao del Norte Representative Robert ‘Ace Barbers, niabot na sab sa iyang termino ug dili na makabalik sa sunod kongreso.
Sa upat ka mga kongresista nga nagsilbi nga orihinal nga co-chair sa nasangpit nga komite, si Antipolo Representative Romeo Acop lang ang magsilbi sa 20th Congress.
Si Acop midagan nga walay kontra sa Antipolo ug nakakuha og 131,925 ka boto.
Ang Quad Committee unang natukod niadtong Agosto 2024 aron imbestigahan ang giingong koneksyon tali sa illegal nga drug trade ug pagpayuhot sa droga sa China sa Pilipinas, Philippine Offshore Gaming Operators, sistematikong pag-abuso sa kapulisan, ug uban pang mga anomaliya nga giingong nahitabo ubos sa miaging administrasyon.
Kini gilangkuban sa upat ka nag-unang komite sa Balay sama sa Dangerous Drugs, Human Rights, Public Order and Safety, ug Public Accounts.
Bisan og nipagawas na og rekomendasyon ang Quad sama sa pagpasaka og kasong kriminal batok kang kanhi Pang. Rodrigo Duterte ug ubang mga kaalyado, sa pagkakaron way klaro kon magpadayon pa ba sa sunod nga Kongreso ang high-profile investigation sa gamhanang komitiba.
