Nipahigayon og lihok-protesta sa dakbayan sa Sugbo ang pipila ka mga progresibong grupo kontra climate change aron idemanda ang pagpasira sa mga coal power plants, ilabi na sa Therma Visayas Inc. (TVI) sa Aboitiz Power sa dakbayan sa Toledo sa kasadpang bahin sa Sugbo ug ang paggamit sa mas limpyo nga tinubdan sa enerhiya.
Mokabat sa 100 ka mga tawo ang misalmot sa global nga kalihokan batok sa coal, nga nagtapok sa P. del Rosario St. sa dakbayan sa Sugbo.
Sa eksklusibong pakighinabi sa Bombo Radyo Cebu kang Krishna Ariola, ang lider sa NGO group nga Center for Energy Ecology and Development (CEED) nga sa ilang datus, 51% sa mga pagkapalong sa kuryente (force outage) sa suplay sa kuryente sa nasod gikan sa mga coal plants.
Diin kini hugaw, mahal, ug dili kasaligan maoy hinungdan dili lamang sa kakuwang sa suplay sa kuryente sa nasud kon dili ilabi na sa kadaot nga dala niini sa kinaiyahan.
Samtang, ang kompanya nga Aboitiz Power nagplano nga magtukod ug ikatulo nga coal-fired power plant sa Toledo City, nga gilaumang magsugod sa tuig 2025.
Dugang pa ni Ariola nga delikado ang seguridad sa stable nga suplay sa kuryente sa nasud kung magpadayon kini sa paggamit sa coal power plants imbes nga mamuhunan sa limpyo nga renewable energy sama sa solar, wind, ug hydropower.
Giinsister usab niya nga ang punto sa ilang pag-apelar dili lang sa gobyerno kon dili lakip na sa kooperasyon sa mga pribadong kompanya ug ilabi na sa publiko.
