CEBU – Pipila sa mga tumutuo ang mibalik na sa ilahang naandan nga pag-penitensya isip paghandum sa Huwebes ug Biyernes Santo.
Sa Tabor Hills sa Barangay Talamban, syudad sa Sugbo, diin usa sa mga dagsaon sa mga tawo kay mingaw pa apan makita nga aduna na’y mibisita arun nga magpahigayon sa ilahang Stations of the Cross, standby usab ang kapulisan alang sa kahapsay ug kalinaw sa area.
Samtang, sa Good Sheperd sa Barangay Banawa ning syudad, diin usa sa inila nga lugar nga dagsaon usab sa mga tumutuo, ang nagsugod na nga gidagsa diin sagad mga pamilya ang nag-uban arun nga mag-penitensya.
Gibutyag ni Mark Anthony Villarmente, usa ka tumutuo, nga tinuig ni nila nga pagabuhaton sa Good Sheperd apan karun pa sila nakabalik gumikan sa pandemya, diin ampo sa ilahang pamilya nga mawagtang na ang kagaw nga mao ang nagdala ug krisis sa Pilipinas, ingon man sa tibuok kalibotan.
Dagko nga mga aktibidad usab ang ipahigayon sa Our Lady of Guadalupe Shrine sa Barangay Guadalupe ning syudad, subay sa paghandum sa Huwebes Santo ug Biyernes Santo.
Gipahibalo ni Sister Therese Parsero, nga karun ug ugmang adlawa kay half day lang ang ‘langub’ nga sagad dagsaon sa mga tumutuo, diin magsugod kini alas 8:30 sa buntag hangtud sa 12 sa udto, ug mubalik ang whole day nga pag-abli niini sugod sa Sabado de Gloria (Black Saturday).
