Suportado sa pipila ka mga traditional jeepney drivers ang transport strikes nga mahitabo ugmang adlawa, Huwebes, Marso 19, nga pagadumalaon sa pipila usab ka mga progresibong grupo sama sa PISTON Cebu, jeepney drivers ug mga motorista.
Gani, gikabutyag sa pipila ka mga drayber sa mga pampubikong transportasyon nga ang 1 nga tubo sa plitihan nga gipahamtang sa Land Transportation Franchising and Regulatory Board (LTFRB), dili kini kasigo nga umento nga giaprobahan na sa LTFRB.
Subay niini, eksklusibong nahinabi sa Bombo Radyo Cebu Newsteam si Renante Naparan, usa ka 21D jeepney driver, diin ang rota niini mag gikan sa Ibabao Mandaue pa ingun na sa Cebu City.
Gihimug-atan ni Naparan nga isip usa ka drayber sa usa ka pampubikong transportasyon, dili igo ang 1 nga giusbaw karon sa plitihan, kinsa ang kanhing 13 pesos, mamahimo lang kining 14 pesos nga bag-ong minumum fare.
Gitino usab ni Naparan nga kaniadto, motubil lang sila sa ilahang gigamit nga sakyanan sa kantidad nga 900- 1,000 pesos matag adlaw apan sa kasamtangan, dul-an na 2,000 pesos ang ilahang makonsumo nga tubil sa usa ka adlaw lang. Kini gumikan sa padayong nagpanikad nga presyo sa krudo sukad pa sa milabayng mga semana.
Tungod niini, gikabutyag ni Naparan nga kung padayon gihapon ang kasamtangang sestima, dako og posibilidad nga mo undang na siya sa pagmanaho og jeep, ug mangita nalang og laing panginabuhian.
Busa, ugmang adlawa, laoman nga ubay-ubay nga mga drayber sa pampubikong transportasyon ang masalmot sa maong kalihokan.
