CEBU CITY — Gitinguha karon sa organisasyon sa mga lider nga maluwas ang mga bata gikan sa mga makamatay nga sakit sama lang sa polio, tipdas, ug uban pa.
Nagkahiusa ang JCI Cebu-Mactan Channel, Relief International, ug uban pang mga ahensya alang sa Supplemental Immunization Activity karong buwan sa Pebrero 2021.
Ubos sa pagpakig-alayon niini sa Department of Health (DOH), mahatagan og bakuna batok sa polio ug rubella virus ngadto sa mga bata nga nag-edad hangtud sa lima ka tuig.
Mosuroy ang mga sakop sa JCI ug Relief International, inubanan usab sa mga tinugyanan sa panglawas ngadto sa mga kabaranggayan sa Metro Cebu aron matabangan ang mga bata batok sa makamatay nga mga sakit.
Gibutyag sa Presidente sa JCI-Cebu Mactan Channel nga si Harvey Entendez Diaz nga nakita nila ang kabalaka sa mga ginikanan kabahin sa pagpabakuna sa ilang mga anak gumikan sa Dengvaxia scare kaniadto.
Pinaagi sa technical assistance sa DOH ug sa mga eksperto, ipasabot nila ang maayong benepisyo sa pagpabakuna ngadto sa mga bata, ilabi na nga nitumaw ang outbreak sa polio ug tipdas.
Nanghinaut si Diaz nga pinaagi sa maong inisyatiba, magmadasigon ang mga ginikanan nga mahuman ang vaccination routine sa mga bata.
Nakita usab ni Lester Ouano, ang Communications & Development Chair sa Relief International, ang epekto sa vaccination scare hinungdan nga negatibo ang persepsyon sa mga ginikanan niini.
Pinaagi sa subsob nga information drive ngadto sa mga ginikanan, mas masabtan nila ang kamahinungdanon niini aron walay usa ka bata ang mabiyaan sa panglawas.
Dugang pa niini nga andam silang mo-abag sa mga komunidad pinaagi sa public participation aron usab nga magpabiling himsog ang mga bata.
Ni-awhag usab ang nahisgutang proyekto nga mabakunahan ang mga bata aron nga ma-immune batok sa mga makamatay nga sakit sanglit libre lang kini.
