CEBU – Bisan tuod makatabang, aduna usay negatibong epekto ang mga gadget ug social media , ilabi na sa pipila ka mga batan-on.
Sama sa pagka-adik, cyber bullying, online nga kahilayan.
Aduna nay mga taho nga nadala sa ospital ang pipila sa mga batan-on tungod sa pagpugong sa ihi samtang naggamit sa social media.
Samtang, ang uban malimot na mokaon kung makagunit na sa mga gadgets og magbabad na sa social media.
Sagad usab sa mga kabatan-onan, mogugol og 4 ka oras pataas sa social media.
Gumikan niini, gisang-at sa Kamara ang House Bill 543 o Social Media Regulation and Protection Act of 2019 nga nagtumong nga limitahan ang paggamit sa social media platforms sa mga menor de edad ngadto lamang sa 30 minutos kada adlaw.
Tinguha usab sa maong sugyot nga panalipdan ang privacy ug seguridad sa mga menor de edad ug did-an ang mga bata ubos sa edad nga 14 anyos sa paggamit sa social media.
