Misalmot ang grupo sa mga pampublikong transportasyon sa Sugbo ang Pagkakaisa ng mga Samahan ng Tsuper at Opereytor Nationwide (PISTON) Cebu sa nasudnong lihok protesta karong adlawa Biyernes, Marso 27, 2026, isip tubag sa ilang panawagan batok sa padayon nga pagsaka sa presyo sa lana.
Sa pagpakighinabi sa Bombo Radyo Cebu, ni Greg Perez, Chairman sa PISTON Cebu, siya mibutyag nga ang mga drayber magpahigayon og hiniusang welga sa nagkalain-laing mga checkepoint sa dakbayan.
Lakip sa mga lugar nga ilang gitarget mao ang kadalanan sa P. Del Rosario, Jones Avenue, Mabolo Junction, Cabangcalan sa Talamban, ug Guadalupe.
Sumala ni Perez, ang pagkunhod sa biyahe sa mga jeep sa Sugbo, gilauman tungod kay daghang mga drayber ang mipahuway ug nakiglambigit sa lihok protesta gumikan sa taas nga presyo sa lana nga nakaapekto sa kita og panginabuhian sa mga driver.
Nanawagan ang grupo sa kagamhanan nga paminawon ang ilang mga yangu-ngo aron matubag ang krisis sa lana nga padayon nga nag-antos dili lamang sa mga drayber apan lakip na sa publiko.
Samtang, misalmot usab ang lain-laing mga organisasyon nga misuporta usab, lakip ang Panaghugpong-Kadamay Sugbo.
Matud ni Belinda Allere, Chairman sa Urban Poor-Cebu, miapil sila sa lihok protesta tungod kay ang mga kabus nga sektor nakasinati usab sa epekto sa pagsaka sa presyo sa lana, labi na sa pletehan ug inadlaw nga gasto.
Gipunting sa grupo nga gikinahanglan ang hinanaling aksyon sa gobyerno aron mapanalipdan ang panginabuhian sa mga drayber ug mga commuter.
