NEGROS OCCIDENTAL-Narekober sa militar sa kabisay-an ang Pito ka high-powered firearms ug uban pang kahimanan sa gubat human sa grabeng panagsangka sa mga sakop sa 94th Infantry Battalion nga milungtad og 15 minutos, batok sa mga salin sa huyang nga mga natad sa gerilya sa NPA, Central Negros 2 (CN2) sa Regional Committee Negros , Cebu, Bohol ug Siquijor (KR NCBS).
Diin human sa engkwentro, duha ka terorista sa NPA ang mi-surrender sa tropa, kay gibiyaan sila sa ilang mga kauban aron mo-atras kay nasayod sila nga gukdon sila sa tropa sa gobyerno.
Ang pito ka mga armas naglakip sa tulo ka M16 rifle; duha ka M14 rifle, usa (1) M4 rifle; ug usa ka Garland rifle.
Samtang ang ubang narekober nga mga materyales sa gubat naglakip sa generator, nagkalain-laing magazine assemblies; ubay-ubay nga lainlain nga buhing bala; personal nga mga butang; ug subersibong mga dokumento.
Subay niini, gipa-abut ni Lieutenant General Benedict M Arevalo PA, ang Commander sa Visayas Command (VISCOM) nga determinado silang tapuson ang lokal nga armadong panagsangka sa rehiyon, sa labing dali nga panahon.
Gidugang niini, nga ang ilang mga paningkamot magpadayon nga walay hunong ug magpadayon ang kadaugan sa kasundalohan batok sa mga wala nga grupo.
Kahinumduman nga niadtong Nobyembre 07, sunodsunod nga engkwentro ang nahitabo sa Brgy Yao-Yao, Cauayan, Negros Occidental nga miresulta sa kamatayon sa duha ka terorista sa NPA ug pagkarekober sa tulo ka armas ug usa ka Anti-Personnel Mine.
Gidayeg ni Lt Gen Arevalo ang tropa, ug giawhag niya ang mga salin sa CPP-NPA sa Kabisay-an nga mobalik sa sabakan sa balaod.
