CEBU – Naluwas ang Pito ka mga lalaki human sila na-stranded sa tunga-tunga sa Hinulawan River sa Barangay Cambang-ug, dakbayan sa Toledo mga alas 11:00 sa buntag gahapon Biyernes, Oktubre 28, 2022.
Giila sa Toledo Bureau of Fire Protection (BFP) ug sa tigpamaba sa Cebu Provincial Disaster Risk Reduction Management Office(CPDRRMO) Wilson Ramos ang maong mga tawo nga sila si Isias Junior Reyes, 33; Alvin Camarig, 40; Edgar Sepada, 51; Wilfred Segarra, 51; Michael Abayao, 29; Marvin Sabanal, 40, kinsa nagkuha og balas ug graba sa maong dapit; ug usa ka 12-anyos nga batang lalaki nga nanguha og sugnod.
Apan, kalit nga nitaas ang tubig sa suba nga giubanan sa kusog nga sulog.
Tungod niini, ang mga na-stranded nga mga tawo mibalhin sa usa ka taas nga bahin sa tunga sa suba aron mapanalipdan ang ilang kaugalingon.
Niresponde dayon sa maong dapit ang Toledo BFP, uban sa koordinasyon sa City Disaster Risk Reduction and Management Office, Philippine Coast Guard, ug pipila ka mga residente sa Barangay Camban-ug.
Matod sa BFP sa Toledo nga nadawat nila ang report mga alas 2:05 sa hapon ug milungtad og kapin sa usa ka oras ang rescue operation.
