Gikustodiya sa Albuera Municipal Police Station sa Leyte ang pito ka mga pulis gikan sa Ormoc City nunot sa ilang presensiya sa residential compound nga nalambigit sa gunman nga mipusil sa miangkon nga drug lord ug mayoral candidate nga si Rolan “Kerwin” Espinosa.
Si Espinosa, 47, gipusil sa dughan atol sa campaign rally sa Barangay Tinag-an, Albuera, niadtong Huwebes sa hapon.
Naangol usab sa insidente ang iyang manghod nga babaye ug runningmate nga si Mariel Espinosa, ug usa ka dalaga nga nakaangkon og menor nga samad.
Matod sa tigpamaba sa Philippine National Police nga si Police Brigadier General Jean Fajardo, ang pito ka mga opisyal napalgan sa compound diin giingong gidala ang gidudahang getaway vehicle human sa pag-atake.
Dugang ni Fajardo nga gisusi karon sa kapolisan kung aduna bay kalambigitan ang maong mga opisyal sa insidente sa pagpamusil.
Gitino niini nga usa ka pursuit operation ang gilusad nga nagtarget sa usa ka ““vehicle of interest” nga misibat gikan sa lugar sa kampanya pagkahuman sa pagpamusil.
Ang pito ka mga opisyal, duha niini mga “commissioned officials” ug lima “noncommissioned”, gikataho nga nagsul-ob og sibilyan nga sinina sa dihang nadiskobrehan.
Dugang pa ni Fajardo nga duha ka mga sakyanan ang napalgan sa maong dapit nga pulos adunay sulod nga tagoanan sa armas.
Ang balay diin nakita ang mga opisyal gikatahong gipanag-iya sa usa ka opisyal sa Department of Public Works and Highways (DPWH).
Bisan pa sa pagsulay sa iyang kinabuhi, si Espinosa namahayag nga dili siya moatras sa iyang kandidatura pagka mayor.
