CEBU CITY – Masigarbohon nga gihatag og gitunol ni Cebu City Mayor Tomas Osmeña ang “Plaque of recognition” ngatdto ni Margielyn Didal, ang Cebuana nga nakalangkat sa gold medal sa 2018 Asian Games nga gipahigayon sa Jakarta, Indonesia sa Skateboarding women’s competition. Kini gihatag sa mayor atol sa kasaulugan sa Osmeña Day.
Nagkanayon ang mayor nga walay kabutangan ang iyang garbo nga dunay Cebuana nga nakalangkat sa gold medal sa natad na usab sa sports.
Proud matud pa siya isip usa ka Cebuano ug nahimo pa kini matud pa nga inspirasyon sa Mayor.
Usa kini matud pa sa mga rason nga hingpit nga matukod ang sakteboard park nga una na nga planong pakatukoron sa may South Road Properties (SRP).
Dugang pa sa mayor nga kaniadto ang iya lang gi-idolo mao si Manny Pacquiao tungod sa nahatag niini nga garbo sa nasud apan karon nakakakita na matud pa siya og kapareha nga mao ang Cebuana nga si Didal.
Samtang emosyunala nga nagpasalamat si Didal sa pagtagad ug pasidungog nga iyang nadawat ilabina nga gikan pa kini sa Mayor. Halos dili na makalitok si Didal sa iyang pagka emosyonal.
Mahinumduman nga gisugat ug gipasidunggan usab si Didal sa mga Cebuano ilabina sa iyang mga silingan ug sa iyang alma mater sa Brgy. Lahug atol sa iyang pag-uli gikan sa Indonesia.
