CEBU CITY– Nanawagan si Atty. Clarence Paul Oaminal, kanhi Dangerous Drugs Board (DDB) Undersecretary, nga mukanaug sa pwesto sila si PDEA Director General Aaron Aquino ug PNP chief Oscar Albayalde.
Kini human sa gipahigayun nga senate probe sa drug-recycling scandal.
Gibutyag ni Atty Oaminal nga susamang wala na magkasinabut ang duha ka mga ‘high ranking official’. Matud pa nga daghan na ug palpak si Aquino ingun man nga dili angayan manalipud si Albayalde sa iyahang mga tawu.
Gikwestyun sa kanhi drug czar nga nganu ug wala gipatuman ni Aquino ang dismissal order niini ngadtu ni Police Major Rodney Raymund Baloyo, kanhi hepe sa Pampanga Intelligence Branch human ang kwestyunabli nga drug operation.
Gipadayag ni Oaminal nga ang korapsyon magsugud sa ilahang mga leader hayan kinahanglan nga unahon gayud kini ug limpyu sa gobyerno.
Kahinumduman nga giangkun ni Aquino kaganiha sa senate probe nga gitawagan kini ni Albayalde kinsang Pampanga Provincial Director niadtung tuig 2013 arun nga dili niini ipatuman ang nahisgutang dismissal order.
Si Bayolo ang team leader sa anti-drug operation nga gipahigayun sa usa ka subdivision sa Pampanga batuk sa usa ka Johnson Lee apan giingung lahi na nga tawu ang gipresentar sa media ug ingun man gikan sa 200 ka kilo nga shabu nga nasakmit, giingung nahimu na lang kini ug 38 kilos. (SBR)
