Nagpasalmat ang hepe sa Philippine National Police (PNP) nga si Gen. Rommel Francisco Marbil sa Department of Justice (DOJ) nga una nang gibasura ang mga reklamo nga gisang-at ni Kingdom of Jesus Christ (KOJC) Pastor Apollo Quiboloy batok kaniya ug sa ubang mga tinugyanan sa balaod bahin sa pag-serve sa mga warrant sa miaging tuig.
Sa usa ka interbyu, gipahayag ni Marbil ang iyang kalipay sa kini nga kalamboan tungod kay siya moretiro na sa umaabot nga Hunyo 7.
Si Marbil, uban ni kanhi Interior secretary Benhur Abalos ug ubang mga pulis, maoy gihinganlan nga respondents sa malicious mischief ug domicile complaints nga naggumikan sa kadaot sa KOJC compound gate atol sa operasyon.
Ang mga reklamo gisang-at niadtong Septiyembre human sa pagpangita ug pagdakop kang Quiboloy tungod sa qualified human trafficking ug uban pang kaso.
Dugang pa ni Marbil, walay rason ang KOJC nga mopasaka og mga reklamo batok kanila sanglit nagtuman lamang sila sa ilang trabaho.
Sa laing bahin, si Abalos miingon nga ang desisyon sa DOJ nagpamatuod nga ang mga aksyon nga gihimo atol sa operasyon nahisubay sa balaod.
Si Quiboloy kasamtangang gitanggong sa Pasig City Jail male dormitoryo nga nag-atubang og kasong child abuse, sexual abuse ug human trafficking.(Bombo Irene Ardiente)
