CENTRAL VISAYAS- Gipangunahan ni PNP Chief Police General Jose Melencio C. Nartatez Jr. ang send-off ceremony sa Task Force Central Visayas alang sa ASEAN Leaders’ Meeting 2026, diin mipasalig siya nga walay hulga sa seguridad ug masiguro ang malinawon, luwas, ug hapsay nga pagpahigayon sa maong internasyonal nga tigom.
Gipahigayon ang seremonya karong adlawa, Mayo 2, 2026, sa Lapu-Lapu City, diin gipahugtan sa mga otoridad ang seguridad pinaagi sa pagdeploy sa task force nga gilangkoban sa liboan ka personnel ug kapin 2,800 ka logistical assets aron suportahan ang operasyon.
Sa iyang pahayag, gibutyag ni Nartatez nga ang Philippine National Police adunay kinadak-ang deployment nga mokabat sa 5,226 ka personnel alang sa ASEAN 2026 security operations.
Dugang pa niini, adunay 732 ka personnel gikan sa Presidential Security Command, 510 gikan sa Bureau of Fire Protection, 250 gikan sa Armed Forces of the Philippines, 200 gikan sa Office of Civil Defense, 150 gikan sa Philippine Coast Guard, 50 gikan sa Lapu-Lapu City Traffic Management System, ug 20 gikan sa Disaster Risk Reduction and Management Office ang apil sa seguridad sa maong kalihokan.
Kabahin usab sa operasyon ang 200 ka force multipliers ug kapin 2,800 ka logistical assets, lakip ang mga sakyanan, mobile patrol units, ug uban pang support equipment.
Matud pa sa PNP chief, ang maong deployment kabahin sa usa ka integrated security framework nga nagtumong sa pagpugong sa posibleng hulga gikan sa terror groups, eco-terrorist groups, ug uban pang kriminal nga elemento.
Gisiguro usab ni Nartatez ang padayon nga 24-oras nga monitoring ug koordinasyon tali sa tanang ahensya sa gobyerno aron malikayan ang bisan unsang insidente nga makabalda sa malinawon ug malampusong ASEAN Leaders’ Meeting 2026 sa Central Visayas.
