Nagpabiling masaligon ang Philippine National Police (PNP) nga sa dili madugay makit-an ug madakpan si Senador Ronald “Bato” dela Rosa, bisan pa man sa padayon niyang paglikay sa mga awtoridad.
Matod ni PNP Chief General Jose Melencio Nartatez Jr., ang usa ka tawo nga gipangita sa balaod dili makatago hangtod sa hangtod—ilabi na nga nagkagamay na ang mga lugar diin siya posibleng modangop.
Busa, naglaum si Nartatez nga sa dili madugay makit-an nila ang senador, samtang nagpadayon ang mga operasyon aron ipatuman ang warrant of arrest nga giluwatan batok kaniya.
Gipasalig usab sa hepe sa nasudnong kapulisan nga nagpadayon ang pagpangita, uban ang makanunayong koordinasyon sa ubang mga ahensya sa pagpatuman sa balaod—ilabi na sa mga unit nga adunay katakos sa pagpahigayon og intelligence operations.
Gikatahong nagpahigayon ang mga awtoridad og operasyon sa tibuok adlaw ug gabii aron susihon ug lihokon ang bisan unsang impormasyon nga mahimong motultol sa nahimutangan ni Dela Rosa.
Gibutyag kaniadto ni Nartatez nga nakadawat ang PNP og dili momenos sa 500 ka mga impormasyon mahitungod sa posibleng nahimutangan sa senador. Kini nga mga impormasyon dili lang basta dawaton; moagi kini sa proseso sa beripikasyon, nga sundan dayon sa aktuwal nga mga operasyon diha sa mga lugar nga natumbok.
Kahinumdoman nga si Senador Dela Rosa ang subject sa usa ka warrant of arrest nga giluwatan sa International Criminal Court (ICC) may kalabotan sa kaso sa mga krimen batok sa katawhan (crimes against humanity), nga naggikan sa kampanya batok sa ilegal nga droga sa administrasyon ni kanhi Presidente Rodrigo Duterte.
