Gipanghimakak sa Philippine National Police (PNP) nga pagpamolitika ang nahitabong deployment sa duha ka batalyon sa Special Action Force (SAF) sa Davao ug gituyo aron pagtabang sa mga imbestigador sa International Criminal Court (ICC).
Kahinumduman nga nahitabo ang deployment niadtong Mayo 24, nunot sa pag-relieve sa 35 ka mga pulis sa Davao City, lakip ang hepe sa Davao City Police Office nga si PCol. Richard Bad-ang, kinsa na-relieve human sa kamatayon sa pito ka mga drug suspects niadtong Marso.
Giklaro sa PNP nga wala’y kalambigitan ang deployment sa SAF personnel sa pag-relieve sa 35 ka mga pulis sa Davao.
Dugang pa nga naka-deploy na sa Davao region ang mga SAF units ug dili lamang sila nakatutok sa Davao Region.
Una nang gikanayon ni kanhi senador Antonio Trillanes IV nga gipaabot nga moluwat og warrant of arrest ang ICC sa Hunyo o Hulyo kang kanhi pangulong Rodrigo Duterte ug uban pang personalidad kalabot sa dugoong war on drugs sa iyang administrasyon.
Naglakip sa ubang mga personalidad nga gikatahong giimbestigar sa ICC sila Sen. Ronald dela Rosa ug kanhi aide nga si Sen. Bong Go.
Sa pikas bahin, gipahayag ni PNP Chief P/Gen Rommel Francisco Marbil nga usa ka rekomendasyon ang gihimo sa regional internal affairs, aron masiguro ang usa ka impartial investigation.
Gihatagan og gibug-aton ni Marbil nga ang protocol sa PNP sa pag-relieve sa gidudahang personnel ang giprayoridad sa kinabuhi sa kapulisan samtang wala pa sila mapamatud-ang sad-an.
Gipahinumdoman usab niya ang mga PNP personnel nga mosunod sa mga balaud ug mahimong “number one follower of human rights.”
