Anaa sa heightened alert status ang Philippine National Police (PNP) kalabot sa gipaabot nga protesta atol sa nagpadayon nga hearing sa International Criminal Court (ICC) batok kang kanhi Presidente Rodrigo Duterte.
Sumala ni PNP Chief Jose Melencio Nartatez Jr., ang tanang unit sa kapulisan kay gibutang sa heightened readiness ug kasamtangang nagmonitor sa posibleng dagkong mga panagtapok aron masiguro ang kaluwasan sa publiko. Miingon siya nga bisan unsa pa ang partido o grupo, ang PNP nagbantay aron mapanalipdan ang ilang mga katungod ug mapadayon ang kalinaw ug kahusay.
Niining bahina, gimandoan usab sa PNP Chief ang mga regional units nga mag-deploy og mga Civil Disturbance Management (CDM) team ug sigurohon nga ang mga medical emergency responder kay anaa sa standby mode kung adunay dagkong mga panagtapok.
Sumala niya, ipatuman ang maximum tolerance, apan ang tanang mga opisyal sa kapulisan kay gimandoan nga magpabiling propesyonal ug likayan ang bisan unsang komprontasyon ug mosunod sa balaod.
Samtang, nanawagan ang PNP Chief sa mga kritiko ug tigpaluyo ni Duterte nga magpabiling kalmado ug dili magpadaog sa emosyon, nga mahimong mosangpot sa kapintasan o kalapasan sa balaod.
Karong Lunes, Pebrero 23, ang ICC sa The Hague, Netherlads magsugod sa upat ka adlaw nga pre-trial nga “confirmation of charges” hearing batok kang Duterte tungod sa crimes against humanities nga may kalabotan sa iyang kampanya batok sa droga. Ang hearing maoy motino kon aduna bay igong ebidensya aron ipadayon ang husay sa korte.
