Nakig-alayon ang Philippine National Police (PNP) sa foreign counterparts niini aron kumpirmahon ang nahimutangan ni Bamban, Tarlac Mayor Alice Guo kinsa gituohang nibiya sa Pilipinas sa miaging buwan.
Matud ni PNP Spokesperson Police Col. Jean Fajardo, adunay posibilidad nga nibiya si Guo pinaagi sa “illegal channel” o “backdoor”.
Giingong maglisod kini sa paggawas sa nasod nga dili mogamit og illegal nga channel tungod kay high profile ang iyang kaso ug daghan ang nakaila kaniya.
Gitataw ni Fajardo nga ilang gihimo ang tanan, bahin sa monitoring, pagpatuman sa warrant of arrest nga giluwatan sa senado, ug bisan sa police assistance ngadto sa mga personnel sa Senate Sergeant-at-Arms.
Nunot niini, gikatahong nakighinabi usab ang PNP sa Direktor sa Aviation Security Group ug gani, dili lang ang main airport ang gibantayan sa kapulisan kon dili lakip na ang mga regional offices nga adunay airport.
