Cebu City- Blangko gihapon ang kapulisan sa lungsud sa Dumaguete sa motibo sa pagpatay sa radio brodkaster sa nga si Edmund Sestoso.
Matud ni Police Supt Jonathan Pineda, ang hepe sa Dumaguete PNP nga basi sa ilang inisyal nga imbestigasyon, wala silay nakuha nga death threat sa cellphone sa biktima o bisan unsang mensahe nga makatabang sa imbestigasyon sa PNP Apan posible usab nga dunay mga mensahe nga na erase na sa biktima.
Wala usab mikumpirmar ang asawa sa biktima nga si Lourdes Sestoso nga nakadawat ug death threat ang iyahang bana sukad nga nahimo na kining regular anchorman sa gitrabahuan niining sibya-anan , ang dyGB 91.7 FM. Matud usab ni Pineda nga bisan ang mga kaubanan trabaho ni Sestuso ang wala usab nasayod kung duna ba kini na kontra.
Hinuon, miumol na ug special investigation task force ang PNP nga gipanguluhan ni Police Sr Supt Edwin Portento, ang Director sa Negros Oriental Police Provincial Office. Nanguha na sab sila ug mga cctv foiotage gikan sa mga establishimento nga nahitabu-an sa krimen.
Nasayran nga duha ka mga lalaki saay sa motorsiklo maoy nipusil sa biktima apan nadala pa kini sa tambalanan. Human sa kapin usa ka adlaw gibawi-an kini og kinabuhi gumikan sa mga samad nga iyahang naaangkon.
