Nangayo og pasaylo ang Philippine National Volleyball Federation (PNVF) sa mga national athlete human gibutyag ni Bryan Bagunas, Captain sa Alas Pilipinas Men’s Volleyball Team, ang mga kalisdanan nga ilang nasinati, lakip ang pagpagawas og kaugalingong kwarta alang sa ilang mga panginahanglan.
Sa opisyal nga pahayag, giila sa PNVF ang mga sakripisyo sa mga atleta ug miingon nga dili angay nga ang usa ka national athlete mapugos sa pagpangutang o mogasto gikan sa kaugalingong bulsa samtang nagtuman sa katungdanan alang sa nasod.
Matod sa PNVF, ang bag-ong liderato ubos ni President Frank Lao nakapanunod og federation nga adunay dagkong utang ug wala pa mahuman nga mga obligasyon.
Gipahibalo usab sa PNVF nga personal nga nagpagawas og pondo si Lao aron matubag ang pipila ka dinaliang panginahanglan sa Men’s National Team sa wala pa ang Asian Games, lakip ang allowance, mga tiket ug mga rekisitos sa visa.
Bisan pa niini, giila sa PNVF nga dili pa igo ang maong mga lakang ug misaad nga palig-onon ang financial accountability ug suporta alang sa mga national athlete.
Samtang, mipasalig ang Philippine Sports Commission nga magpadayon kini sa pagsuporta sa Alas Pilipinas ug makig-alayon sa bag-ong liderato sa PNVF aron matubag ang mga panginahanglan sa national team.
