Gi-contempt sa House Quad Committee si Police Capt. Kenneth Paul Albotra tungod sa giingong pagpamakak niini.
Matod ni Quad Comm co-chair Joseph Stephen Paduano, nga makapungot ang padayon nga pagpamakak ni Albotra, bisan paman gipasidaan na kini sa makadaghang higayon nga dili mamakak.
Sa interpretasyon ni Paduano, gisisu si Albotra bahin sa iyang duha ka mga tawo, diin usa niini girelibohan sa katungdanan.
Apan, sa dihang gipangutana kung unsa ang hinungdan, si Albotra wala makahinumdom bisan unsa.
Busa, si Albotra itanggong sa detention facility sa Kamara hangtod nga masang-at ug maaprobahan kini sa plenary ang committee report sa Quad Comm hearing.
Kung mahinumdoman, niadtong tuig 2018, tunga-tunga sa flag ceremony sa City Hall sa Tanuan, Batangas, usa ka sniper ang nipusil-patay sa mayor sa dakbayan nga si Tanaun Mayor Antonio Halili.
Matod sa mga imbestigador, posibleng may kalambigitan ang pagpatay kang Halili sa politiko o sa kampanya niini nga “Walk of Shame” batok sa krimen.
Diin giparada niini ang mga akusado sa lain-laing kaso nga giposasan ug adunay giplastar nga karatula.
Ingon man nga mitumaw ang maong pagpatay sa anhing alkalde sa dihang nahisgutan ni Retired PCol. Garma sa Quad Comm, kinsa nagkanayon nga gipasigarbo ni Albotra ang pagpatay sa Mayor apan gihimakak ang maong akusasyon.
