CEBU – Girelibuhan sa iyahang katungdanan isip Cebu Police Provincial Office (CPPO) director si Police Colonel Engelbert Soriano sugod Hunyo 12, 2022.
Kini human nagpagawas ang Camp Crame nagpagawas og direktiba sa paghulip kang Soriano, kinsa temporaryong gidestino sa Personnel Holding Admin Unit sa national headquarters sa Philippine National Police (PNP) epektibo niadtong Domingo, Hunyo 12, 2022.
Si Police Colonel Elmer Lim, ang kasamtangang hepe sa Logistics Division sa Police Regional Office sa Central Visayas (PRO-7), maoy kasamtangang officer-in-charge sa CPPO.
Sakop si Lim sa Philippine National Police Academy class of 1998 ug nadestino sa CPPO sa wala pa ang iyang assignment karon sa PRO-7.
Base sa press release gikan sa Camp Crame nga gipagawas niadtong Martes, Hunyo 14, nahisubay ang relief ni Soriano sa probisyon sa PNP Memorandum Circular 2022-002, nga nag-ingon nga ang Provincial Director, City Director o COP (chief of police) sa NCRPO kinahanglang huptan sa usa ka PCOL (police colonel) sulod sa continuous period sa usa ka tuig, ma-extend hangtod sa labing taas nga tulo ka bulan human maaprobahan sa CPNP (chief PNP).
Wala man hinuon gibutyag sa Camp Crame kung aduna ba kini kalambigitan sa isyu sa pagsul-ob sa face mask sa probinsya sa Sugbo kung diin giuyonan ni Soriano ang kamandoan ni Cebu Governor Gwen Garcia.
