CEBU CITY – Patay ang usa ka police officer human kini gipusil kagabii sa sa Sitio Kabangkalan, Barangay Daanglungsod, dakbayan sa Toledo, probinsya sa Sugbo.
Giila ang biktima nga si PO2 Melchezedek Batomalaque nga nadestino sa Toledo Police Station ug karon anaa sa Police Regional Office-Autonomous Region in Muslim Mindanao naka-assign human nga ma-relieve tungod sa kaso nga adunay kalambigitan sa iligal na drogas.
Sa pakighinabi sa Bombo Radyo kang SPO1 Roxam Eñero sa Toledo Police Station, giingon niini nga gikan ang biktima sa hearing sa dihang gipusil sa mga wala pa mailhi nga suspetsado.
Matud ni Eñero nga pauli na unta ang biktima sa dihang gi-atngan kini sa mga suspek nga sakay sa usa ka motorsiklo ug gipusil.
Naigo ang police officer sa iyang ulo ug dughan hinungdan sa iyang hinanaling kamatayon.
Narekober sa crime scene ang 3 ka empty shell sa kalibre .45 nga armas ug ang motorsiklo sa biktima.
Samtang, ang gitan-aw karon nga motibo sa mga otoridad sa nahitabong krimen mao ang kalambigitan niini sa iligal nga drogas sanglit nasayran nga usa ka high value target ang maong police officer.
Sa karon padayon ang imbestigasyon sa mga otoridad ug ang pag-ila sa mga gunmen.
