Nakaangkon og mga samad ang usa ka Police Officer human naanod ug nahulog sa bung-aw ang iyang sakyanan sa Transcentral Highway sa Balamban, Probinsya sa Sugbo tungod sa nibulhog nga kusog nga tubig.
Giila ang pulis nga si Police Master Sergeant Mohaliden Kamsang Samod, 44-anyos, sakop sa 1st Provincial Mobile Force Company (PMFC) sa Cebu Provincial Police Office.
Basi sa inisyal nga imbistigasyon nga nagmaneho kini paingon sa sidlakan sa Cebu City subay sa Transcentral Highway sa dihang nahitabo ang aksidente.
Matud pa nga misulay kini sa pagbalik paingon sa Balamban human makasugat og kusog nga pagdagayday sa tubig ug danlog nga dalan taliwala sa kusog nga ulan dala sa Tropical Depression Wilma.
Apan, mikusog ang bulhog sa tubig hinungdan nga naanod ang sakyanan sa kilid ug nawad-an si Samod og kontrol.
Wala magdugay nilihis sa dalan ang gisakyan niini nga sakyanan ug nahulog sa lawom nga bung-aw.
