CEBU CITY – Luwas sa pagpamanhig ang usa ka police officer ug ang igsuon niini sa Sitio Paho, Poblacion, Samboan, Cebu niadtong Biyernes Santo, Abril 19 .
Giila ang maong police officer nga si Master Sergeant. Roy Calavida, 36 anyos; ug ang iyang maguwang nga si Nanette Deparine, 50 anyos.
Matud ni Police Master Sgt. Leopoldo Godinez Jr. sa Samboan Police Station nga gikan lang mitambong og misa silang Calavida ug iyang pamilya sa St. Michael Archangel Church sa nahisgutang dapit.
Nakadestino si Police Master Sergeant Calavida sa headquarters sa Police Regional Office – VII sa Camp Sergio Osmeña, Cebu City.
Gipusil sa wala mailhi nga gunman silang Calavida ug misibat kini dayon sakay sa iyang motor.
Nakahiagum si Police Master Sgt. Calavida og samad-pinusilan sa iyang tiyan ug wala nga paa samtang samdan si Deparine sa iyang lubot.
Kasamtangang nagpaalim ang duha sa usa ka tambalanan sa dakbayan sa Sugbo human nakaluwas sa maong pagpamanhig.
Narekober gikan sa crime scene ang 18 ka mga empty shells sa M-16, mga bala sa calibre 9mm, ug magazine sa caliber 45 nga pistola.
Dugang pa ni Police Master Sgt. Godinez nga patay ang tuyo sa maong gunman.
Kasamtangang gipangita ang wala mailhi nga gunman pinaagi sa hot pursuit operation samtang nagpadayon ang imbestigasyon sa maong ambush incident.
Padayon pang gisuta sa kapulisan ang motibo sa pagpamanhig ni Calavida ug igsuon niini ubos sa hot pursuit operation.
