CENTRAL VISAYAS-Gisugdan sa Police Regional Office 7 ang bulan sa kababayen-an pinaagi sa usa ka mabulukon nga parada.
Kung diin, ang mga babayeng pulis sa Police Regional Office 7 ug non-uniformed personnel gikan sa nagkalain-laing police units mi-welcome sa 2024 National Women’s Month pinaagi sa parada aron palig-onon ang pakigtambayayong niini sa komunidad.
Kini adunay tema nga “Lipunang Patas sa Bagong Pilipinas, Kakayahan ng Kababaihan, Patutunayan”, kung diin nagpasiugda sa talagsaong pasalig ug dedikasyon sa kababayen-an sa pagsiguro sa kaluwasan ug seguridad sa komunidad.
Ang kalihokan nagsugod sa usa ka parada gikan sa Camp Sergio Osmena, Cebu City, ug nipadayon sa Fuente Osmeña Circle ug balik sa kampo nga nagdala sa tagsa-tagsa ka mga bandila sa nagkalain-laing police units aron pagdani ug pagdasig sa suporta sa pagsaulog sa National Women’s Month.
Gisundan kini sa Zumba ug usa ka hamubo nga programa.
Kung diin nitambong sa okasyon si Ms Regina Mercedes “Jojo” M Lingaolingao, Cebu City Women and Family Affairs Commission (CCWFAC) Executive Director ug usa ka dedikado nga alagad sa publiko.
Matod niya, gikinahanglan ang usa ka kusgan nga babaye aron makabarug alang sa iyang kaugalingon ug usa ka labi ka kusgan nga babaye aron makabarug alang sa uban.
Nanawagan siya sa tanang kababayen-an nga magtinabangay aron hunongon ang pag-abuso batok sa kababayen-an ug kabataan ug tabangan sila nga makabarog ug ipabati ang ilang gagmay nga mga tingog.
Samtang, si PBGen Anthony Aberin, PRO7 Regional Director, adunay taas nga pagtahod sa mga kababayen-an sa pagpatuman sa balaod nga dako og natampo sa nasud.
