CEBU CITY-Adunay gisubay nga personalidad ang Police Regional Office sa kamatayon ni Coach Jay human migawas ang resulta sa forensic examination sa sakyanan niini.
Kahinumduman nga si Unchuan napalgan nga wala nay kinabuhi sa Sitio Palanas Barangay Inayagan dakbayan sa Naga niadtong kaadlawon sa Disyembre 30, 2024.
Matod ni Police Lt. Col. Gerard Ace Pelare spokesperson ni Pol. Brig. Gen. Anthony Aberin hepe sa PRO7 nga tungod sa maong kalamboan, sila mohimo og mas lawom nga imbestigasyon kauban ang kapulisan.
Dugang niini, nitakdo ang forensic result sa iksaminasyon nga gihimo base sa mga ebidensiya nga nakuha sulod sa sakyanan sa biktima ug ngadto sa gihisgutan nga “person of interest’.
Sa pagkakaron, dili pa muhatag og pangalan ang kapolisan ug di pa usab nila masulti kung kaila ba kini sa biktima tungod kay padayon pa gihapon ang maong imbestigasyon.
