Gipahugot karon ang seguridad sa mga tunghaan sa Dakbayan sa Sugbo, basi sa gikabutyag ni Police Lieutenant Colonel Franco Oriol, ang tigpamaba sa Cebu City Police Office.
Atol sa eksklusibong pakighinabi sa Bombo Radyo Cebu kaniya, iyang gidugang nga sa sukad pa pagsugod og abli sa klase niadtong Hunyo 8, aduna nay mga sakop sa kapulisan ang gipa-deploy sa mga nagkadaiyang tunghaan sa Sugbo, mapublikong tunghaan o pribado man.
Matod pa ni Oriol, “existing” na ang police security sa tibuok school year.
Apan, sa bahin usab sa madugoong panghitabo sa San Jose NH, Tacloban, matod niya, mas gipahugtan pa ang seguridad sa kasamtangan, ilabi na ang police visibility sa matag tunghaan.
Gani, dugang gipahibalo ni Oriol nga gilakip na karon ang Mobile Patrol ug Motorcycle Patrol, ug ingun man ang koordinasyon sa mga barangay tanod ug force multipliers.
Kini nga mga lakang, matod pa niya, aron masiguro nga ang tanang tunghaan adunay kapulisan o law enforcement matag buntag ug dismissal sa klase.
Samtang, gikanayon usab ni Oriol nga aduna nasay mando alang sa mga Station Commander karon sa pag-assess kung asa nga tunghaan sa kasamtangan ang walay security.
Kini nagtumong sa dugang deployment sa mga Police Personnel sa mga tunghaan nga vulnerable, aron masiguro nga dili mahitabo ang susamang nahitabo sa Tacloban.
Gawas sa paghugot sa police visibility, giasoy usab ni Oriol nga gipahugtan usab karon ang access control sa mga tunghaan, tungod kay basi sa ilahang na-obserbaran, adunay pipila skwelahan ang daghan entrance apan, apan minus ang security.
