Cebu City– Blangko pa ang kapulisan sa Tabuelan PS sa motibo sa pagpusil patay sa usa ka pulis sa lungsod sa Tabuelan.
Giila ang pulis nga si PO1 Avita Sarzuelo, 37 anyos ug residente ra usab sa nahisgutang lugar.
Gibutyag ni Police Inspector Emmanuel Rabaya ang hepe sa Tabuelan PS, padong kini si Sarzuelo sa mercado gumikan aduna man kini silay tindahan sa naasoy nga lugar sa dihang giatngan kini sa upat ka mga suspetsado nga nagsakay ug motor ug gipusil sa makadaghan nga higayon.
Ang biktima sakay sa iyang sakyanan nga adunay plate number ABN 4145 ug wala usab kiniy dala nga armas sa nahitabong insedente. Dugang pa ni Rabaya nga nakadawat sila ug report nga involve kini si Sarzuelo kabahin sa illegal nga drugas.
Kasamtangan kining na assign ang pulis sa Personnel Holding and Accounting Unit sa Cebu Provincial Police Office.
