CEBU – Mokabat sa 95 ka mga pamilya nga gikonsiderar nga “poorest of the poor” sa Barangay Ocaña, dakbayan sa Carcar sa habagatang Sugbo ang makabenepisyo sa gipatuman nga socialized housing project inabagan sa Kalambuan sa Dakbayan (KD) Foundation Incorporated.
Kini human ang presidente sa KD Foundation nga si Jose Daluz III miingon nga ilang gipili nga tabangan ang mga residente sa Carcar City, partikular ang Ocaña, tungod kay barato pa ang yuta.
Matod niya nga nagkahiusa usab ang mga sakop sa homeowners association sa pagpaningkamot nga makapangita og desente nga kapuy-an sulod na sa kapin usa ka dekada, hinungdan nga gitawag nila ang proyekto nga Panaghiusa Village.
Ang unang 30 ka mga yunit mahuman sa ulahing bahin sa 2023, samtang ang laing 30 ka mga yunit gilauman nga mahuman sa 2025 ug ang nahabilin nga 35 ka mga yunit mahuman sa 2025.
Matod ni Daluz nga ang Panaghiusa Village magsilbi nga template sa ubang mga proyekto sa KD Foundation, nga nakigtambayayong sa SHFC, Carcar City Government, Presidential Commission for the Urban Poor, SCDC ug Department of Human Settlements and Urban Development.
