CEBU CITY — Nanawagan si Pope Francis sa tibuok kalibutan nga mag-ampo taliwa sa krisis nga dala sa coronavirus disease.
Atol sa iyang sinimana nga Angelus message sa Vatican, mipahibalo ang Santo Papa nga mohatag kini og espesyal nga “Urbi et Orbi” blessing subay sa nagkagrabe nga sitwasyon, ilabi na sa Italy diin daghan kaayo ang nangamatay ug nataptan sa sakit nga COVID-19.
Matud ni Pope Francis nga ipahigayon ang “Urbi et Orbi” (o to the city and to the world) nga blessing karong Biyernes sa gabii (oras sa Vatican) gikan sa St. Peter’s Square.
Sagad nga mohatag ang santo papa sa iyang espesyal nga panalangin matag Pasko ug Dominggo sa Pagkabanhaw.
Apan gituyo ni Papa Francisco ang “Urbi et Orbi” subay na sa nasinating hagit sa kalibutan.
Samtang mihangyo usab ang Santo Papa sa publiko nga mosalmot sa worldwide prayer karong Miyerkules pinaagi sa pag-ampo sa usa ka “Amahan Namo”.
Hangyo karon ni Pope Francis nga magkahiusa ang tanan sa pag-ampo aron sa ingon makalingkawas gikan sa makamatay nga sakit. (Reuters/GN)
