Gideklarar sa Portugal ang nasudnong adlaw sa pagbangotan human sa labing menos 15 ka mga tawo ang namatay sa dihang ang usa ka funicular cable railway nadiskaril ug naigo sa usa ka building sa Lisbon.
Lakip sa mga namatay ang mga langyaw samtang 18 ang naangol sa insidente diin lima ang grabe ang kahimtang ug usa ka bata ang nahiagom og gagmayng samad.
Ang public prosecutor’s office kay nag-abli sa usa ka imbestigasyon sa insidente diin ang kinatibuk-ang ihap sa mga tawo nga sakay sa Gloria funicular, ingon man ang mga pagkatawo ug nasyonalidad sa mga biktima kay padayon pa nga gitino.
Sumala sa mga taho sa lokal nga media, ang mga nakasaksi sa insidente nag-ingon nga ang kable naputol sa agianan sa sikat nga karsada nga wala’y preno, hinungdan nga nawad-an kini og kontrol ug nabangga sa usa ka building duol sa “Avenida da Liberdade”.
Ang cable railway kay 140 ka tuig ang edad ug nagkonektar sa downtown Lisbon ngadto sa taas nga quarter, nga popular sa mga turista.
