CENTRAL VISAYAS-Gihatagan og katin-awan ni Mark Gales, weather specialist sa Pagasa Mactan ang mikatap nga video sa social media kabahin sa giingong ‘tornado’ nga miigo sa lungsod sa Liloan nga miguba sa pipila ka mga balay sa Purok Greenhills ug Purok Nangka niadtong Lunes, Hulyo 8.
Sa pakighinabi sa Bombo Radyo Cebu kang Gales gipaambit niya nga wala sila’y nakita nga ipo-ipo gumikan ang timailhan niini kay adunay kusog nga pagtuyok apan, ang anaa sa video hinay nga hangin lang ug mao kini ang nimugna og hinay nga pag-rotate.
Dugang pa niya nga posibling usa ka “gust front” o usa ka downburst, nga kasagaran mag-una sa kusog nga pagbundak sa uwan panahon sa bagyo ang maong panghitabo.
Hinuon iyang giawhag ang mga Sugbuanon nga dili mokompyansa ug magpabilin sa sulod sa balay panahon sa thunderstorms aron malikayan nga maigo sa naglupad nga mga butang.
Subay niini, gipahibalo usab ni Gales nga makasinati og mga pag-ulan ng dakbayan sa Sugbo sa mga umaabot nga adlaw tungod sa inter-tropical Convergence Zone nga mao’y magdala og mga pag-uwan sa dakong bahin sa Central Visayas nga molungtad pa hangtud sunod semana.
Ingon man nga aduna sila’y namatikdan nga posibleng maporma nga low pressure area sa East ug Mindanao nga gipanglantawan nga moigo ang extension niini sa Central Visayas.
