CENTRAL VISAYAS-Gi-report sa Department of Social Welfare and Development (DSWD) 7 ang pag-ubos sa ‘poverty incidence’ sa mga pamilya sa Central Visayas sa unang semester sa 2023.
Sumala ni DSWD 7 Director Shalaine Lucero sa Central Visayas, niubos ang poverty incidence gikan sa 26.8 porsyento sa unang semester sa 2021 ngadto sa 23.9 porsyento sa unang semester sa 2023, niadtong Hunyo 11, 2024.
Ang datos nga gitaho sa DSWD 7 gikan sa Philippine Statistics Authority (PSA).
Kung diin ang poverty incidence mao ang gidaghanon sa mga indibidwal nga adunay kita nga ubos pa sa per capita poverty threshold nga gibahin sa kinatibuk-ang gidaghanon sa mga indibidwal.
Gi-report usab sa DSWD 7 ang pagkunhod sa “subsistence incidence” sa rehiyon gikan sa 16.4 porsyento sa unang semester sa 2021 ngadto sa 13.7 porsyento sa parehas nga panahon sa 2023.
Ang subsistence incidence mao ang mga Pilipino kansang kita dili igo aron mapalit bisan ang mga batakang panginahanglan sa pagkaon.
Matud ni Lucero nga niadtong 2023, ang DSWD 7 migasto og P13.2 bilyones alang sa social protection program niini nga nakaserbisyo sa 2.3 milyones ka benepisyaryo.
