CEBU – Nimando si Bohol Governor Aris Aumentado nga ipanghatag ang mga kinahon-kahon nga personal protective equipment (PPEs) nga gidam-ok lang sa Pres. Carlos P. Garcia sports complex ug wala kini magamit.
Sa usa ka pakighinabi, gibutyag ni Aumentado nga ipanghatag na sa kalungsuran ang mga PPE’s sa mosunod nga mga adlaw.
Matod pa sa usa ka kasaligang tinubdan sa Provincial Health Office (PHO), nga dili lang ang mga PPEs nga alang sa mga health frontliner sa ilang protection batok sa pagtakod sa Covid-19 infection ang napundo sa buhatan kon di aduna usay mga kinarton nga ‘face masks’.
Matud sa tinubdan nga ang kanhi administrasyon sa provincial government sa Bohol wala mag-order sa PPEs, apan, ang Department of Health (DOH) nag-deliver niini nga gihatud gikan sa kaulohan sakay sa mga wingvan ug walay pundo gikan sa probisnya ang gigugol alang niini.
Gilangkuban ang naasoyng PPE’s sa mga ‘gowns’ nga ‘light blue’ ug puti (with blue stripes).
Basi sa sticker nakatapot sa kada cartoon sa PPEs, gi-order kini sa DOH ug ang supplier niini mao ang SPRO Medical Products (Xiamen) Co. Ltd. sa Xiamen, China.
